كل ثانيه بموت
...
مالك يا قلبى
ليه مستخبى جوا البيت
ليه حابس نفسك
فى قلب البحر الغويط
راح فين قلبى
اللى بيحب اللعب والتنطيط
ليه دايماً بتحلم
بكوابيس مليانا عفاريت
انا مش لاقى قلبى
اللى كان بيضرب بيه المثل فى الحواديت
...
عمرى ما كنت أصدق
انى اشوفك خايف
وغير اللون الأسود
فى حياتك مش شايف
نفسي اسمع كلمه واحده
م الجوز الشفايف
...
طب ضمنى بايديك
كسرلى كل الضلوع
طب بصلى بعنيك
قولى ايه الموضوع
طمني عليك
عشانك انا موجوع
قولى ايه فيك
وليه بتشتى عينيك دموع
لو منى زعلان اراضيك
ولا انت بقيت عليا ممنوع
...
انا بحلم ولا انا صاحى
ليه بيطفوا شموع افراحى
وكل أما اداوى جرح
بيزودولى جراحى
...
دى آخر مره اشوفك فيها
طب هاتى حضن كبير
دى آخر بوسه منى هتخديها
وآخر مره اضفرلك شعرك الحرير
دى آخر مره ألمس ايديها
اللى عليها من النسمه بغير
...
هتوحشينى
يا نن عينى
يا روح قلبى
وعشق سنينى
...
هتوحشنى
ضمتك
ضحكتك
رقتك
هتوحشنى
خطوتك
كلمتك
حنيتك
...
طب بعد منك
مين هيصحينى من نومى
وهيكويلى هدومى
ويحطلى برفان
...
مين هداعبها وهى بترتبلى اوضتى
مين هاخدها فى حضنى واقولها يا حبى
وتقولى بطل جنان
...
طب بعد منك
مين هيحس بيا
ويخاف عليا
ويدعيلى من قلبه
...
مين هيقف جنبى
وأشكيله همى
وكل اسرارى عنده
...
هى اللى عشت معاها
كل عمرى وصبايا
هى اللى هواها
ساكنى وساكن حشايا
...
هى مش بس واحده بحبها
هى حياتى كلها
....
هى اللى بقولها بأعلى صوت
انا بعد منك
تايه
ضايع
مضروب على ضهرى بميت نبوت
...
هى اللى بقولها بأعلى صوت
انا بعد منك
خايف
ضعيف
كل ثانيه بموت
....
....
كل ثانيه بموت
حسن محمد على
ليست هناك تعليقات:
إرسال تعليق