القميص الموف
--------
حضنها النهارده
مش ذى اى يوم
وسماها الصافيه
مليانا غيوم
-----
انا مش حاسسها
حتى وانا لامسها
مش دى انفاسها
ولا دى احاسيسها
-----
بتحاول تبقى طبيعيه
مع انها بتمثل عليا
-----
دى مش ريحه عطرى
اللى انا بعملهلها
حتى عرقها لسه فيه عرق
اللى كان حاضنها
-----
حتى وهى بترقصلى على جانا الهوى
اللى بحبها
بترقص غصب عنها
-----
بترقص برجلين بطيئه
بترقص وهى حزينه وكئيبه
-----
وعينيها حيرانه وشارده
واحاسيسها ومشاعرها بارده
-----
وشعرها الغجرى المجنون
مليان صمت وسكون
-----
وخصرها الشقى النحيل
ليل ضلمه وطويل
-----
وضحكتها المليانه ملاغيه
باهته
وجواها مليون حكايا مداريه
-----
وعسل شغايفها
اللى انا عارفها
مليان مر وعلقم
صمتها قال كل حاجه
من غير ما تتكلم
-----
كل ما فيها رافضنى
كل ما فيها بيقول
امشى وسيبنى
------
ومشيت وانا مليان اهات
وريحه عرقها مقبلانى فى كل الطرقات
ماهو عرق النساء ذى البصمات
كتير بس دايمآ فيه اختلافات
-----
وريحه عطرى اللى بعملهولها مخصوص
مستحيل حد يقلده
حتى لو طلبه من عفريت الفانوس
انا صاحى ولا دا كابوس
عرقها وعطرى محوطينى فى كل الاتجاهات
-----
أااااه مكتومه فى ضلوعى
ومحبوسه جوا عينى دموعى
وبتبكى عليا كل شموعى
------
انا مش هشم عرق تانى
انا مش هعمل عطر تانى
انا مجنى عليه ولا انا جانى
-----
انا عمرى فى غيرها ما فكرت
ولا عمرى مع غيرها حاولت
طب ليه تهدملى كيانى
------
كانت معاه بتبقى فرحانه وسعيده
كانت بتلاقى حاجات جديده
مكنتشى بتلاقيها فى احضانى
------
وماشى وانا مش دارى بنفسى
الدنيا ساقعه اوى وبردان
لأ انا كتير اوى حران
لأ الدنيا بتشتى على راسى
لأ دا انا بحمى نفسى من حر الشمس بكراسى
------
انا ماشى
انا واقف
انا بجرى
---
انا ساكت
انا بضحك
انا ببكى
----
معقول كانت بترقصله على جانا الهوى
وهى لابسه القميص الموف
اللى انا اشتريته
-----
معقول كانت بتاخده فى حضنها
كان هو عشقها
طب كان فى بيتنا
ولا كان فى بيته
--------
ورجعت وانا مليان هموم
ومن كل فرح الدنيا محروم
-----
فتحت الباب
بعد سنين غياب
وحشنى اوى البيت
المليان تراب
------
دخلت البيت وانا مليان جروح
وكل حاجه بتفكرنى
باللى كان حبيب الروح
-----
هنا كنا بنقعد نتفرج عالتليفزيون
وهنا كانت بتقولى بحبك بجنون
------
وهنا كنا بنسقى الورد
وبنحلم بإللى جاى
وهنا كنا بنقعد
نشرب شاى
------
وهنا كانت بترقصلى
بتبوسنى
بتقرصنى
بتخلينى فى السحاب
-----
وهنا شفتها واحده تانيه
فى لحظه
فى ثانيه
ماليتنى عذاب
------
وهنا وهنا وهنا
وانا فى وسط
هنا وهنا وهنا
-----
شفت حاجه مصدقتهاش
انا شايفها بجد ولا نظرى طشاش
اقرب وأتأكد ولا بلاش
------
بتقدم خطوه
وبرجع خطوتين
ومسحت عينيا
بدل المره اتنين
-----
قربت اوصل
وخايف اكمل
-----
حاجه سحبتنى من إيدى
غصب عنى
غلى الدم فى وريدى
جوا منى
----
انا حاسس ان رجليا مش شيلانى
انا حاسس انى هموت فى مكانى
------
ايوه هوه
ايوه انا شايفه
ذى ما هوه
لسه انا فاكره
فى قلب كيسه
وعليه ورقته
القميص الموف
-------
-------
------
القميص الموف
حسن محمد على
ليست هناك تعليقات:
إرسال تعليق